About This Course
學朱古力，最重要唔係睇人做，而係自己親手做過。
我哋每年都會開辦一次朱古力循環課程，而呢個亦係我哋唯一一個讓同學多次親手實習朱古力調溫嘅課程。
每位同學一人一份材料，親手完成自己嘅調溫及作品。由觀察朱古力狀態，到實際操作時遇到嘅問題，導師都可以即場指導及糾正。
因為調溫唔係睇一次示範就學得識。要自己做過、遇過問題、知道點樣修正，先可以由唔識，真正練到識。
而我哋教嘅調溫方法，唔需要使用溫度計，整個製作過程亦唔需要朱古力爐。所有技巧都以家庭式操作為出發點，讓同學學完之後，返到屋企一樣可以重做。
課程透過 8 款不同作品，學習倒模、入餡、封底、朱古力球及朱古力粒造型、外層沾裹、噴槍裝飾等技巧；從幼滑、流心到香脆，接觸不同朱古力口感與製作方式。
每堂完成嘅朱古力數量亦相當充足，除了有足夠份量實習，完成品亦足夠自用及送禮。
把握一年一度機會，由調溫開始，真正學識親手製作朱古力。
林志輝
Lesson by Lesson
豉油柚子雙層朱古力 (24 粒)
Soy Sauce & Yuzu Layered Bonbon
豉油與柚子組成雙層餡料，鹹香與清新果香互相平衡。亦可選擇省略豉油層，製作成純柚子朱古力版本。
實習： 朱古力模紅金雙色上色、朱古力餡調溫、朱古力倒模、入餡、封底、甩模
示範： 朱古力調溫、豉油糖漿製作
榛子雅文邑白蘭地朱古力球 (24-28粒)
Hazelnut Armagnac Chocolate Truffle
以自製 50% 榛子醬配搭雅文邑白蘭地，朱古力內餡細滑濃郁，外層裹上香脆榛子碎，帶出豐富堅果香與淡淡酒香。
實習： 朱古力餡調溫、朱古力球製作及造型、朱古力調溫、外層榛子碎處理
示範： 自製 50% 榛子醬
榛子 Gianduja 冧酒朱古力球 (20-24粒)
Gianduja Rum Chocolate Truffle
榛子 Gianduja 配搭冧酒製作幼滑內餡，外層包裹朱古力，榛子香濃郁，帶淡淡冧酒香。
實習： Gianduja 調溫、朱古力球製作及造型、朱古力調溫、花紋造型
蜜糖青檸雙層朱古力 (24粒)
Honey & Lime Layered Bonbon
雙層內餡結合流心蜜糖與清新青檸朱古力，酸甜平衡；外層以朱古力噴槍塑造細緻質感。
實習： 朱古力倒模、蜜糖餡入餡、青檸餡調溫、朱古力封底
示範： 朱古力調溫、朱古力噴槍裝飾、蜜糖糖漿製作
青柑檸紅桑子朱古力 (28粒)
Kalamansi & Raspberry Ganache Chocolate
青柑檸嘅清新果酸配搭紅桑子果香，製成細滑朱古力餡，酸甜鮮明而平衡。
實習： 朱古力模上色、朱古力餡調溫、朱古力倒模、入餡、封底、甩模
示範： 朱古力調溫
紅桑子朱古力脆球 (20-24粒)
Raspberry Chocolate Crunch
酸甜紅桑子朱古力包裹香脆內芯，外層再裹上紅桑子，果香鮮明，入口酸甜香脆，層次豐富。
實習： 紅桑子朱古力調溫、朱古力脆球造型、包裹紅桑子外層
示範： 脆脆製作及處理
鳥結糖片朱古力 (300-350g)
Nougat Chocolate Slab
堅果香濃郁，口感香脆而富有層次。
實習： 杏仁醬朱古力調溫、鳥結糖片製作、朱古力造型
榛子牛油爆谷朱古力粒 (32或64粒)
Hazelnut & Button Popcorn Bonbon
榛子朱古力配搭自製爆谷，濃郁堅果香中帶牛油爆谷香氣，香脆而富有層次。
實習： 榛子餡調溫、朱古力粒造型、牛油爆谷朱古力製作、外層朱古力沾裹及組合
示範： 自製爆谷、朱古力調溫
循環課程共有 4 堂，原則上不設請假、補堂或代堂。
若同一循環課程設有其他班別，而個別課堂尚有空位，我哋可視乎實際情況協助安排調堂，但並不保證一定能夠安排。
如遇特殊情況，可以與我們聯絡。